Hýrurin er góður í FCH-leirinum í dag, eftir ein sera tættan dyst ímóti grannunum úr HB, sum koppaði til okkara fyrimun í evstu løtu. Trý kærkomin stig eru í hús, og vit hava nú fingið eitt sindur av luft niður til hini botnliðini, áðrenn truplu uppgávurnar ímóti AB og TB komandi vikurnar.

"Fantastiskt avrik í 89 minuttir" var niðurstøðan hjá venjarinum, tá leikararnir høvdu funnið inn aftur í skiftingarrúmið eftir dystin, og orðini lýsa gongdina mikukvøldið ímillum FC Hoyvík og FC Suðuroy sera væl. Í einum dysti ímóti oddaliðnum, sum millum annað bjóðaði uppá ársins avbrennara, koyrdi tað mesta eftir okkara præmissum líka til síðstu løtu. Men tá samanumkom eydnaðist tað FC Suðuroy at sleppa sunnanfjørðs aftur við øllum stigunum.

FC Hoyvík var mikukvøldið á vitjan í Eysturoynni, har Skála tók ímóti. Skálamenn hava staðið seg sera væl í 1.deild í ár, og millum annað fingu teir 4 stig við sær úr Suðri vikurnar undan summarsteðginum, so tað var ein torfør uppgáva menninir hjá Súna Fríða skuldu loysa.

Eins og Skála hevur FC Hoyvík eisini staðið seg væl síðstu umførini, so einki var avgjørt frammanundan. Og í einum dysti, har FCH leikararnir vístu sera góðan vilja og til tíðir gott spæl, eydnaðist at fáa eina stigið heim við aftur til Havnar.

Síðstu dystirnir í fyrru helvt eru leiktir, og liðini bæði fara nú í summarferiu. Eingin venjing verður komandi tríggjar vikurnar, men hósdagin 14.juli leggja vit til brots aftur, og væntandi er ein venjingardystur á skránni leygardagin 16.juli. Á Ólavsøku er eisini planlagdur ein venjingardystur ímóti Undrinum, og møguliga verður onkur dystur afturat áðrenn kappingin av álvara fer ígongd aftur 3.august.