Síðsta leygardag sá alt ljóst út hjá FC Hoyvík. Ein týdningarmikil dystur bleiv vunnin ímóti EB/Streymi, og 1.lið felagsins sá fram ímóti komandi uppgávum við bjartskygni. Men sum øllum kunnugt, broyttist alt sunnumorgunin tann 22.mai í Heystfirði.

Fótboltur hevur ikki fylt nógv í huganum á leikarum og annars fólki flest farnu dagarnar. Syndarliga vanlukkan, har tveir mans gingu burtur í aldunum, hevur skakað Føroya fólk, og FC Hoyvík bleiv eisini rakt sera meint av tilburðinum.

Okkara egni 2.liðs venjari, Sigmund Kári Hentze, var annar av monnunum, sum ikki kom afturíaftur, og hettar hevur sett síni djúpu spor ímillum leikarar og onnur, ið vara av felagnum. Trupult er at ímynda sær, at ein av okkara ikki er ímillum okkum longur, og prátið til venjingar í vikuni hevur einans snúð seg um tær løtur, vit høvdu saman við dámliga eiðismanninum, og um ta lagnu hann fekk.

Tað er tí við døpurhuga, at ein setur seg at skriva frásøgn um ein 1.deildardyst, men lívið gongur víðari, og dagsins dystur á Argjum skuldi eisini avgreiðast

Veðrið var av tí besta leygardagin, tá FC Hoyvík tók ímóti teimum næstbestu hjá EB/Streymi. Hoyvíkingar høvdu til uppgávu at reisa seg eftir lemjandi ósigurin týskvøldið ímóti Skála, og dysturin hevði eisini sera stóran týdning, um hugt verður at stigatalvuni. Áðrenn dystin hevði FCH einans fingið skavað 7 stig saman eftir 7 dystum, og um tað endaði við enn einum ósigri, vildi niðurflytingarstrikan av álvara andað liðið í nakkan. Skaðar, karantenur og avboð førdu við sær, at fleiri broytingar vóru at síggja á liðnum, og eitt nú hevði venjarin valt at seta seg sjálvan fram í álopið.

Uppgerðin í 1.deild í Gundadali týskvøldið ímillum FC Hoyvík og Skála hevði stóran týdning fyri bæði feløgini. 7 stig stóðu á kontoini hjá liðunum áðrenn dystin, og fyri at blanda seg uppí kappingina í ovari helvt av deildini, var kravið til báðar partar ein sigur. Ein javnur dystur var í væntu, men tá avtornaði vunnu skálamenn greitt og uppiborið, ímeðan FC Hoyvík leikararnir sita eftir við ongum, og kunnu saman við venjarinum hugsa um orðsøkinar til, at so skuldi verða.

Tað var ikki hissini dystur áskoðararnir vóru vitni til í Gundadali leygardagin, tá annað lið hjá FC Hoyvík spældi sín fimta dyst á árinum. Mótstøðuliðið var B36, sum undan kappingini hevði sett sær fyri at rykkja eina deild hægri upp, og teir løgdu eisini út sum eitt óløgið. B36 sat á øllum fyrstu løtuna, og álopini skolaðu oman yvir nýggju verjuna hjá FC Hoyvík. Eftir 20 minuttum var støðan 3-0 til B36, og einki bendi á, at FCH skuldi fáa nakað sum helst burturúr hendan dystin.